九巴以「鬼巴」掩飾嚴重脫班問題，其實港產官僚嘅施政作風都差唔多o架咋，得個空殼冇靈魂，所以頻頻發生搞鬼笑話。
嗱嗱嗱，如果要舉例子，真係長過九巴站頭條人龍o架，例如話，安老政策變虐老棄老啦，扶貧工作愈扶愈貧啦，壓抑樓市愈壓愈升啦……功夫茶今日想講單新鮮啲嘅，就係海岸保護區淪為堆填區嘅醜聞！
件事係咁嘅，大嶼山貝澳鹹田舊村被列為海岸保護區，限制挖掘同堆填，點知入面有一幅棄耕農地五年來不斷遭人傾倒泥頭同建築廢料，簡直變咗一個堆填區。嗱，無誇張o架，本報記者現場直擊發現，農地之上泥石、紙箱、木板等建築廢料大量堆積，面積有半個標準泳池咁大，高度有半個人咁高，問你服未！
好多人都知，貝澳生態資源豐富，貝澳河更加係一個不可多得嘅生態寶庫，家陣無端端淪為建築廢料堆填區，垃圾堆積，沙塵滾滾，唔令人擔心就假。環保團體警告，廢料堆填範圍若然持續擴大，隨時將周邊濕地填平，繼而污染毗鄰嘅貝澳河，造成嚴重生態災難。
講到呢度，大家有無覺得奇怪呢，港府成日話重視保育，點解一場生態危機迫在眉睫，居然呆若木雞，無動於衷？鹹田舊村明明納入海岸保護區，點解仲有人明目張膽破壞環境？唔通政府部門同荒棄農地上嘅垃圾一樣，都係廢嘅？
唉，講起就搞笑咯。原來環保署○七年已經知道情況，但係聲稱堆填活動獲得地主同意，所以無違反廢物處置條例喎；地政總署就以農地屬私人地段範圍，並無違反地契條款為由，拒絕介入；規劃署仲離譜，明明知道該區無申請堆填，但就袖手旁觀，理由係有關地段唔係「發展審批地區圖」範圍之內，規劃署無執法權力喎。
你話嘞，港產官僚有無用心辦事吖？當局施政係咪有名無實吖？海岸生態環境慘遭蹂躪，居然束手無策，咁要海岸保護區嚟做乜呢？港產官僚一句法例所限，就任人摧毀環境，咁將鹹田舊村劃入海岸保護區又有乜意義呢？
咪話功夫茶以君子之心度小人之腹，港產官僚根本冇帶個心返工，搞到保育法例支離破碎，漏洞多多，所以生態環境咪災難多多囉。好似龍尾灘人工沙灘工程咁吖，研究復研究，諮詢又諮詢，籌備咗近十年，本來下個月開工，點知又被環保團體踢爆環保問題多多，強行施工有違國際保育條款，工程隨時爛尾收場。環團係咁講嘅，前朝煲呔曾政府為籠絡新界鄉紳，罔顧生態環境及市民利益！
一句到尾，保育不力毀生態，執法粗疏遺禍大。港產官僚快快補番好隻鑊，唔好學貪曾咁污染官場生態，遺臭萬年吖！