強積金「半自由行」下月實施，可能當局預計投訴個案有上升趨勢，尋日就宣布將強積金計劃上訴委員會嘅規模擴大，由現時嘅五名成員增加到九名，仲打破以前只用專業人士嘅慣例，加入勞工界別嘅成員，包括工聯會理事長吳秋北及勞聯副主席吳慧儀，令到委員會有多啲打工仔嘅聲音，充分體現新政府平衡各界利益嘅風格。
吳慧儀話，當然歡迎政府呢個做法啦，因為可以加入打工仔嘅聲音，令到業界明白打工仔面對嘅問題，所以就二話不說應承加入委員會。佢又話，相信積金局宣傳做得好嘅話，應該唔會有太多投訴個案，否則代表咗半自由行好多漏洞。吳秋北都話歡迎當局嘅做法，令委員會更有說服力。
除此之外，財政司司長揀咗退休上訴庭副庭長司徒冕做委員會主席，副主席就由資深大律師石永泰連任，所有委員嘅任期由下月一日生效，為期兩年。