工黨立法會議員何秀蘭（Cyd）之前企圖挑戰內務委員會副主席一職，但慘被建制派聯手封殺。尋日內會投票選出新一屆政府帳目委員會七位成員，原先雙方傾好各自派人出選，點知人民力量黃毓民中途殺入爭位，建制派隨即變陣，寧願要毓民加入委員會，都要繼續封殺競逐連任嘅阿Cyd，搞到阿Cyd低票落選。
做咗帳委會兩年委員嘅阿Cyd，最後以廿五票不敵攞到三十四票嘅黃毓民連任失敗。佢話晏晝開泛民主派飯盒會時已經知道建制派唔會投票畀佢，又話自己素來對規程問題非常執着，得唔到建制派支持係理所當然。
不過，成件事又唔怪得晒建制派嘅，事關如果泛民可以同人民力量傾掂數團結一致，相信建制派一定唔可以成功封殺阿Cyd，而莫乃光之前亦唔會失落資訊科技及廣播事務委員會副主席個位啦。
至於帳委會正副主席，分別由石禮謙同謝偉俊出任，其餘委員包括吳亮星、陳克勤、梁繼昌同梁家傑。