政情：唔做議員 劉秀成財路多
前建築、測量及都市規劃界立法會議員劉秀成，九月選舉連任失敗後，身為著名建築師嘅佢，搵真銀機會反而多咗，財源滾滾來，真係唔做議員好過做。佢嚟緊星期一就會飛去美國，探望矽谷做電腦業嘅囝囝，同埋兩歲嘅孫，認真優哉游哉。
劉秀成尋日話，自己以往做立法會議員，除咗周身唔得閒外，為咗避免利益衝突，亦少咗好多搵錢機會。依家就好喇，業界朋友知佢冇做議員後，即時為佢提供咗唔少工作機會，可以專心做建築師。不過，乜都係假，享家庭樂先最緊要，所以講起嚟緊見到家人同兩歲嘅孫，心都甜埋。
唔使成日留喺香港開會，劉秀成早前去咗內地安徽參觀，見到當地發展咁迅速，內心都有啲驚訝同羨慕。佢又話，未來將會繼續努力幫自己有份籌組成立嘅智庫組織「大舜政策研究中心」籌款，唔會輕易畀組織就咁摺埋，一定會持續做政策研究咁話。