中環出更：蔡加讚回味黑山之旅
位於法國南部嘅摩納哥，近年成為鐘錶界人士嘅旅遊熱點，事關當地近年大力催谷嘅WPHH頂級鐘錶珠寶展，人氣指數急升。早前喜運佳鐘錶主席蔡加讚（Karson）、常務董事梁青華（華哥）及太子珠寶鐘錶執董朱繼陶等業界名人，就齊搭私人飛機到摩納哥參加展覽，順道暢遊賭城蒙地卡羅及黑山共和國，盡享地中海靚景及美食。首次踏足黑山嘅Karson好雀躍，勁讚當地天氣及景色靚絕，海鮮又好味，聲言下次要帶女友去度個浪漫地中海假期。
Karson話，今次係佢首次到前南斯拉夫加盟國黑山遊玩，當地人口僅六十五萬，居民生活樸素寫意，唔似香港咁城市化，令佢留下深刻印象。可惜只係回程時短暫停留喺黑山食飯，未能玩個痛快。咁不如第日約埋甜心女友汪圓圓再去玩過囉？Karson笑稱：「一定會嘅！等我事業有成先啦！」
蔡家收購喜運佳，到下個月就滿兩年，難怪Karson心急想做出一番成績，等爸爸「玩具大王」蔡志明放心交棒。
今次同行嘅仲有百利建集團董事總經理陳正欣、東方表行太子爺等人，連埋主人家合共八個人，團友中就有三位鐘錶業總會前主席，認真夠晒「重量級」。
私人飛機 飛得穩定
第一次搭私人飛機嘅華哥話，私人飛機嘅航道喺四萬三千呎高空，比一般客機嘅三萬九千呎仲高，所以全程好穩定，連杯水都平靜無紋。
生意人，時間就係金錢，所以此行安排緊湊，抵埠首日參加鐘錶展開幕，第二日搭船遊地中海，然後就取道黑山打道回府。有熱愛遊艇嘅富貴團友，仲分秒必爭約定賣家喺黑山睇辦添！
卓妮