中環出更：張永霖夫婦加國撞見好友
醉心教育嘅港大專業進修學院校董會主席張永霖（Linus）同太太Silvia，早就以加拿大為半個家，一年有一半日子喺當地歎世界，佢哋早前就去咗湖畔小城基隆那（Kelowna）避暑，當地夏天氣候宜人，係名人度假天堂。Silvia笑言，喺香港「難得一見」嘅名人好友，竟然喺加國一一重遇，世界真細小。
Silvia近期同老公返咗香港，見佢容光煥發，原來多得加國嘅清新空氣。咁啱得咁蹺，前行政會議成員范鴻齡夫婦都喺當地，兩家人相約參觀基隆那嘅葡萄園及酒莊，喺湖光山色下盡情品嘗美酒佳餚，如置身世外桃源。
至於Linus返港後，就忙於打理明德學院，佢身兼該校校董會主席，正努力為學院籌款。Linus狂「碌」人情卡搵好友捐錢，太太Silvia就請纓做「三合一」助手 ，兼任老公秘書、私人助理同司機，夫唱婦隨，認真合拍。