教育局局長吳克儉一上台就火燒後欄，一場反對國民教育科嘅群眾運動，搞到佢老人家民望急跌至阿媽都唔認得，仲得到一個「唔得掂」嘅花名添。吳局長嘅民望有冇可能谷底反彈呢？計功夫茶話齋，唔再繼續跌已經還得神落，事關教育局正面臨另一個嚴峻考驗，就係手起刀落嘅殺校危機嘞。
大家都知啦，香港人愈來愈唔鍾意生兒育女，出生率始終維持低水平，適齡學童買少見少，唔少學校都出現收生不足嘅尷尬情況。於是乎咯喎，殺校危機迫在眉睫，明年中一適齡學童將會減少五千四百人至五萬九千七百人，係中學歷年收生最困難嘅一年。教育專業人員協會估計，政府如果維持現行政策，八十間中學有機會被殺，預料二百七十名教師飯碗不保。所以教協就建議嘞，明年起每班收生下限由三十六減至三十人，殺校線由現時三班五十一人下調至兩班二十六人。教協將於十月二十一日舉行「維護中學穩定」教師團結大會，要求教育局處理縮班殺校問題。
喂喂喂，殺校呢家嘢影響好深遠o架，一方面人之患會失業，另方面小朋友會失學。萬一沙塵滾滾殺錯良校，十年樹木百年樹人嘅美麗願景隨之泡湯。你話嘞，若然吳克儉拆唔掂呢一個學界炸彈，係咪會再次爆到八月十五開花吖？
之不過咁，局長大人似乎學精咗唔少，回應立法會議員提問嘅時候佢強調，政府對於適齡學童減少已經好有經驗，雖然升中人數未來幾年會累積下跌一萬一千人，但到二○一七／一八年度將會回升至現有水平，政府應該採取過渡性紓緩措施，長遠改變反而可能產生另一波動盪。吳局長又話，八十間中學被殺嘅估計唔一定係事實。
如果功夫茶冇錯誤解讀，吳克儉嘅意思係以不變應萬變，學校可以唔殺就唔殺。所以話佢學精咗唔少就係咁解囉，唔似得硬銷國民教育初期咁死牛一便頸，講到死一死令到自己冇彎轉。
若然真係以不變應萬變，呢個策略無可厚非o架。雖然港男港女唔願意傳宗接代啫，畢竟仲有好多雙非孕婦來港產子，幾年之後話唔定真係會有足夠嘅適齡學童，學校收生不足嘅情況有可能紓緩。至於小班教學，呢個教育界提出咗幾年嘅訴求，唔該教育局老爺奶奶認真考慮下啦。
總而言之，功夫茶贈吳克儉兩句：學校不能隨便殺，除非局長玩自殺。假如教育局鐵板一塊，硬係以收生不足為名磨刀霍霍亂咁殺校，局長大人嘅民望只會進一步跌至貼地o架咋！