特首梁振英（CY）尋日到立法會發言講施政理念，除咗個別泛民主派議員「無中生有」話要有答問環節外，原來亦有建制派中人有心事，講緊嘅係身兼屯門區議會及鄉議局主席劉皇發。話說CY喺結語部分，感性話香港唔係少數人嘅香港，係七百萬人嘅香港，從太平山、獅子山、八仙嶺同鳳凰山俯瞰香港，看見繁華嘅一面，也看見發展的迫切需要，點知發叔話佢冇提及青山喎。
發叔話，CY冇提及青山，換言之即係唔重視屯門甚至係佢喎。如果係咁，將來啲高官發言真係乜都要噏齊，莫非連發叔嘅發迹地龍鼓灘都要講埋先至夠尊敬？發叔講講吓，忽然提早預告唔會出席下月一日嘅特首答問大會，原因係本月底會陪同太太到貴州扶貧四至五日，聲稱呢個活動一早安排咗喎。發叔講到咁重視屯門，係咪應該出席答問大會，親自當面問吓CY呢？