政情：拉布拖累 潘佩璆冇糧出
前立法會議員潘佩璆喺香港島直選未能勝出，結束議員生涯，但佢發現非議員生活事事順遂，唔止收入多咗，遲啲仲娶新抱添。潘醫生話，佢做議員期間，喺聯合醫院兼職精神科顧問醫生，由於上年度立法會「拉布」期間要留守「戥腳」，所以試過幾個月完全冇糧出。
不過，自從佢卸任議員職務後就全面重投醫務，喺本月一日起，已經做番全職顧問醫生工作，佢坦言依家收入好過以前，目前工作亦都較議會工作時舒服，因為相比喺醫院嘅工作，議員工作幾乎係多過一份全職工作喎，總之佢依家嘅生活可以話係如魚得水。
當問到有咩錦囊送畀一眾議員新丁時，潘醫生就形容議會係「鬥爭場所」，非飲茶食飯嘅地方，所以有火花係正常現象。
他又笑言如果「唔受得就快啲返屋企抖」，但佢相信一眾議員新丁都打得，所以立法會將繼續精彩。