政情：立會新丁大鄉里出城
新一屆立法會增加至七十個議員，除咗口水浪花多咗外，新丁都多咗好多。雖然呢班新丁喺政壇打滾多年，但始終係立法會新丁，所以佢哋見到每一樣嘢都覺得好新鮮，似足大鄉里出城咁款。當中最有趣嘅係極具「分量」嘅金融服務界張華峰，佢最關注立法會內嘅膳食，一見到記者就大讚五樓咖啡室嘅自選公仔麵，話次次都要食足三條香腸至夠飽，唯一不足係冇煎蛋食喎。
愛吃嘅張華峰連條領呔都係印滿豬仔，咁啱得咁蹺同屬經濟民生聯盟嘅梁君彥同林健鋒，條呔都係有動物圖案，但前者係河馬、後者係綿羊，好似動物園咁，真係話冇夾埋都冇人信。不過，張華峰都唔係一味掛住食嘅，佢對自己嘅「處子」發言非常緊張，總共請咗三位文膽做寫手，每人分別負責政治、民生、經濟範疇，佢仲話係自己貼錢請文膽，因為立法會份津貼一啲都唔夠使。
有人對「食」好關注，但新民黨田北辰（田二少）就對「飲」好注重，由於五樓咖啡室嘅咖啡唔啱佢口味，於是買咗杯外賣咖啡返立法會，仲施施然行入會議廳，結果即時被保安阻止。田二少當時先至知原來立法會規定唔准議員帶食物進入會議廳，但佢都算聽話，即場飲咗大啖咖啡，然後麻煩保安幫佢保管住先。田二少唔識規矩，田大少就唔熟新立法會大樓啲路，一行出會議廳周圍問人廁所喺邊。
怕凍葛珮帆 粉紅頸巾搶鏡
同樣係新丁嘅民建聯葛珮帆，佢去過南極都冇話怕凍，但尋日竟然投訴會議廳冷氣好凍，成日戴住條粉紅色頸巾走嚟走去，但成條粉紅色咁搶眼，似乎搶鏡作用多過保暖用途囉。就連工聯會陳婉嫻都覺得新大樓好新鮮，佢見到班議員為咗輪流接受記者訪問，好似輪街症咁一個個企晒喺度，即刻問點解依家扑咪都要排隊喎。其實嫻姐知名度高就話唔使博上鏡啫，但扑咪對於好多議員嚟講就係一個上鏡嘅黃金機會囉。