中環出更：鄭錦鐘法國酒莊獲送酒
保良局副主席鄭錦鐘（Eric）向來識飲識食，對品味紅酒甚有心得，早前佢就帶同囡囡參加由香港賽馬會主辦嘅訪尋酒莊旅行團，穿梭於著名嘅法國葡萄酒產地波爾多。Eric話，為期七日嘅行程，參觀咗多個具有名氣的酒莊，包括武當（Mouton Rothschild）、馬高（Margaux）與白馬（Cheval Blanc）等。
今次旅程不但有酒莊主人親自設宴，身兼當地賽馬會主席嘅波爾多Sauternes酒區市長亦特設一場香港賽馬會盃賽，認真畀面。不過，最令Eric窩心嘅，係Guiraud酒莊主人發現十六位團友當中，只有佢同囡囡並非夫妻檔，莊主即以其囡囡嘅出生年份贈送甜酒一箱，以表達對佢哋父女融洽關係嘅欣賞。
Eric又話，佢曾以兩名孫兒嘅出生年份，向St.Emilion酒區嘅Chateau Angelus酒莊訂購印有孫兒肖像嘅紅酒共六百支，並寄存酒莊內，留待孫兒長大後於喜慶日子享用，今次旅程就順道去探吓呢批紅酒喇。