中環出更：仁濟「嫁女」人齊到賀
仁濟醫院靚女總理兼江源集團太子女吳春秀（Tracy），上周六喺沙田凱悅酒店舉行結婚註冊儀式，與拍拖年幾嘅內地金融才俊殷月拉埋天窗。披上嫁衣嘅Tracy幾度開心落淚，見證婚禮嘅親友們都被感染。仁濟主席鄭承隆（Edwin）形容，今次係歷史罕見嘅仁濟嫁女盛事，事關董事局內未嫁嘅女總理一向唔多，當日竟然有多達十五位總理到場觀禮，難怪佢笑稱董事局開會都冇咁齊人喇。
結婚簽字儀式喺酒店室外花園舉行，仁濟副主席梁昌明、總理吳國榮、鮑誠業、鄭李華熙及孫蔡吐媚都有出席，仲有菁英會創會兼榮譽主席施榮忻、副主席曾鳳珠、副秘書長王嘉恩及王文博等，事關Tracy都係菁英會成員。Tracy父親兼江源集團董事長吳鎮明表現依依不捨，佢話有六個仔，但只得Tracy一位寶貝女，一提愛女出嫁就哽咽。
鄭承隆結婚要問葉劉
親家奶奶殷媽媽好識做，公開讚賞新抱德才兼備、乖巧懂事，多謝吳家栽培咁好嘅女畀佢，仲話阿仔娶到Tracy係前世修來嘅福氣。新奶奶愈講愈激動，仲眼濕濕，舉手發誓話會睇實個仔，唔畀佢變心，一眾親友聽到拍爛手掌。卓妮追問已有女友嘅Edwin，有無些少衝動想結婚？啱啱加入新民黨做副主席嘅Edwin，無厘頭搞笑話：「要問葉太（新民黨主席葉劉淑儀）先！」唔通黨員結婚，都要受黨紀約束？
吳家喺內地投資醫院、物流等生意，內地朋友多，加上男家親友亦多數喺內地，所以Tracy話，兩人今年底將喺廣州擺酒，宴請各方好友。
卓妮