吓？唔係啩？九巴居然呻窮，話上半年已經錄得一千五百萬元虧損喎。對於呢一個所謂嘅虧損數字，功夫茶真係有好大保留囉，原因係九巴前年同舊年仍然賺大錢。唔使多講啦，九巴呻窮嘅目的只有一個，就係事先吹風然後醞釀加價。未講今次加價嘅理由是否充分之前，不如等功夫茶同大家溫故知新，睇下九巴舊年做過乜乜東東芫荽葱。
舊年年初，九巴提出一個令人深惡痛絕嘅要求，竟然獅子開大口申請加價百分之八點六。面對一個咁變態嘅要求，全港市民梗係群起抗議啦，卒之經過討價還價之後，行政會議批准九巴加價百分之三點六。當時嘅運輸及房屋局局長鄭汝樺係咁講嘅，加幅已較巴士公司提出嘅申請減半，行政會議審批之時已考慮六大因素，希望巴士公司與市民共度時艱。
有一點大家必須注意，九巴母公司前年錄得八億七千萬元盈利。換言之，九巴係喺賺錢嘅情況之下要求加價。
好嘞，睇番今次九巴又點講吖。九巴董事總經理何達文話喎，多項營運成本急劇上升，其中超低硫柴油自去年起上升四成，員工薪金支出上升百分之九，隧道開支增加百分之五，不過載客量下跌，每日只得大約二百五十萬人次，影響公司盈利能力，上半年錄得一千五百萬元虧損。
睇到呢度，大家明唔明點解功夫茶對於呢一個所謂嘅虧損數字有保留？冇錯嘞，前年先至賺八億七千萬，舊年先至加價百分之三點六，因乜事幹今年突然之間會轉盈為虧嘅呢？成本上升，客量下跌，姑且當你係事實，之但係會唔會造成咁大落差呀？
當然啦，功夫茶冇權走去九巴查佢數簿，冇辦法掌握準確數據，純粹從常識嘅層面去推測咁解嘅啫。如果要掌握準確數據，咁就要麻煩行政會議好好篤一篤計算機嘞，畢竟只有行會先至有權否決九巴嘅加價申請。
不如咁講啦，前朝曾蔭權政府就話官商勾結到出晒面啫，現屆梁振英政府如果有意擺脫官商勾結嘅臭名，不妨認真為小市民做一件事，嚴格防範公營交通機構一次又一次掠水。
喂，香港話就話有一個可加可減機制，不過從來冇見過公營交通機構減價囉，票價永遠都係向上調整，肉隨砧板上嘅小市民確係好慘o架。尤其係家住偏遠地區嘅草根階層，想話搭車出市區搵工都諗過度過，無非係因為家陣嘅交通費貴到冇人性。
嗱，民生無小事呀，九巴如果真係又申請加價，對於民生影響好大o架，行政會議千祈唔好助紂為虐。總而言之一句到尾，加風不可長，行政會議有義務徹查九巴數簿，嚴防出口術欺詐市民！