政情：范寧複製貧民窟喚關注
貧富懸殊唔係香港獨有嘅問題，無國界醫生（香港）主席范寧早前去咗孟加拉首都達卡，仲專程探訪當地嘅貧民窟，見到貧民窟居民嘅生活環境真係極之惡劣。佢返嚟香港之後，喺金鐘一個名店林立嘅商場，用木板複製咗個貧民窟，希望窮極都有個譜嘅香港市民，喺行商場享受購物樂之餘，都關心吓喺繁華大都市背後嘅「小城市」貧民窟。
范醫生早排去咗達卡最大嘅貧民窟坎蘭格查，原來嗰度正係整個達卡市嘅垃圾傾卸區，每日都有五噸垃圾倒喺嗰度。雖然該處臭氣沖天，周圍都係垃圾同污水，但仍然有唔少無家可歸嘅貧民搭屋居住，靠喺垃圾堆「尋寶」同執膠袋洗乾淨去賣，當地過半數兒童長期營養不良。最令佢擔心嘅係，貧民窟附近有間工廠經常排放有毒廢料，住喺貧民窟嘅小朋友又經常喺傾卸區度玩，肯定會影響健康。
范醫生表示，隨住愈嚟愈多地方城市化，就會出現更多嘅貧民窟，希望各國政府唔好忽視貧民窟居民嘅生活同醫療需要，香港等富有地區嘅人民亦應施以援手。