建制派喺新一屆立法會中包攬立法會大會、內務委員會、財務委員會三大要職，連多個事務委員會嘅主席位都要死攬唔放做足四年，令唔少人擔心上屆「返嚟就郁」嘅剪布奇招即將遍地開花，殊不知，效率奇高嘅建制派，位都未坐定就郁手，借刀剪布。
唔知大家仲記唔記得，暑假前嘅政府架構重組方案激起「拉布」千重浪，一眾泛民議員為咗唔畀方案通過，鑽盡議事規則嘅空子提出多項動議，仲一度將「拉布」戰線拉前至財委會同人事編制委員會。
當時就有議員去信財委會主席，話議事規則中議員「可以動議一項議案」，應該被理解成「只能提出一項動議」。不過當時嘅財委會主席就對呢個「另類解讀」無動於衷，點解？因為當時主席係民主黨劉慧卿嘛！
時移世易，昔日嘅財委會已轉由建制派「當家」，尋日有人急不及待去信新任主席自由黨張宇人，再次陳明佢呢個「另類解讀」，仲將佢呢個「另類解讀」擴大至人事編制委員會同工務小組委員會，如果張宇人對呢個「另類解讀」「有所共鳴」，議員嘅發言將會被大大限制。唉，只怪當日泛民主派「拉布」太盡興，變相「提醒」建制派要「堵塞漏洞」。