政情：陳健波低價掃海怡夠和味
前立法會議員陳茂波出任發展局局長後風波不絕，連食餐飯飲兩啖啤酒都畀人大作文章。上屆經常畀人同陳茂波（阿Paul）調亂嘅保險界議員陳健波（KP）運程就啱啱相反，自動當選連任唔在講，一向投資有道嘅佢，原來早前喺低位一口氣掃咗兩個海怡半島單位用嚟收租，賺價又賺租，認真和味。
估新界天價樓或會跌價
阿Paul夫婦因買賣舊樓惹禍，KP就因買豪宅而致富，年前佢先後買入多個貝沙灣單位，依家升值隨時超過一倍。早前政府推出額外印花稅打擊豪宅炒風，令豪宅售價一度回落，KP就睇準時機掃入兩個海怡單位，經豪裝後以好價租出。佢透露有關單位樓價現已升唔少，加埋幾年後港鐵港島南線通車，肯定會再升，最少揸多幾年先放，唔受額外印花稅影響，數口真係好精。
KP估計，豪宅樓價點都會企硬，但一啲新界偏遠地區嘅天價新樓，相信一加息就會跌價，投資者要小心。佢又話依家嘅低息環境無可能永遠持續，其中一個變數係嚟緊嘅美國總統選舉，如果白宮易主或會對美國財政政策帶來影響。