政情：建制瞓身力谷鼠王芬
立法會建制同泛民就部分委員會主席人選談判破裂，雙方要鬥人多加入委員會然後投票選過，其中司法及法律事務委員會嘅競爭最激烈，建制派支持經民聯嘅梁美芬，泛民就支持公民黨郭榮鏗（Dennis）。到尋日為止，建制同泛民加入上述委員會都各有十一人，議員加入各事務委員會今日中午截止，呢個委員會隨時會有超過三十人加入。
下周二就會選出各事務委員會嘅正副主席，除咗寸土必爭嘅政制事務委員會外，建制派今屆亦都力爭喺保安、交通同司法及法律事務等三個委員會中做足四年主席。據知建制派喺政制、保安、交通都信心十足，對於司法及法律事務委員會，據聞有建制派中人提出配額制，要求每兩個建制派議員派一個加入委員會，務求喺選主席時瞓身簇擁鼠王芬做主席。
與泛民已無談判餘地
建制派原本要求同泛民輪流各做兩年主席，頭兩年由法律界Dennis出任，之後兩年就輪到鼠王芬。但事關司法委員會自九八年起一直由公民黨吳靄儀出任，今屆吳靄儀退下火線，泛民自然想由Dennis或者黨魁梁家傑做番呢個位，即係雙方已無談判嘅餘地。
鼠王芬尋日狠批公民黨破壞建制派同泛民中人一直以來行之有效嘅協調機制，又話司法委員會主席個位又唔係刻住公民黨個名，公民黨無理由可以好似世襲咁將個位留畀Dennis。佢又話選舉已經完咗好耐，外界至今仍然對佢作出無日無之嘅指控同抹黑，佢除咗得啖笑之外都無晒符喎。
建制同泛民除咗不停派人加入上述主席人選傾唔掂數嘅委員會外，對加入其他事務委員會都好踴躍。暫時最多議員加入嘅係發展事務委員會，有廿七人，而最少人加入嘅係公務員及資助機構員工事務委員會。暫時民主黨涂謹申、劉慧卿同工黨何秀蘭等人已經報名加入八個委員會，但工聯會黃國健暫時淨係加入人力、保安同政制三個委員會，成為一眾議員中加入委員會最少嘅人。總之一句：量力而為喇，加入咗委員會但唔開會，或者加入咗之後又退出，都唔講得上係勤力o架。