中環出更：李應生見證7000萬攪珠
中六合彩係唔少人嘅發達夢，所以電視直播六合彩攪珠，收視率應該唔低。中藥業協會理事長李應生（Tommy）以太平紳士身份做六合彩攪珠監場多次，佢話年前見證過頭獎七千萬嘅一次攪珠，諗番起都覺得好興奮。
自爆買六合彩幸運號碼
Tommy監察攪珠過程之前，有時都會買番條心水冧巴捧吓自己場，雖然冇中到，當做善事都一樣開心。佢話自己嘅幸運號碼係六，貪佢順順利利好意頭，最勁試過中四個號碼，都叫有收穫。佢話唔好睇攪珠短短幾分鐘，其實預備工夫繁複又嚴謹，有次佢有公務在身連趕兩場，差啲趕唔切。
問佢上電視直播嘅趣事，Tommy笑謂，有時為求出鏡好睇啲，工作人員提醒佢要先印吓面油，以免「反光」。其實Tommy只係氣色好，紅光滿面啫。Tommy早前赴吉林長白山進行商務考察，參觀當地嘅人參加工廠，打算將靚人參引入旗下集團。
卓妮