今屆立法會選舉自動當選議員嘅申報選舉開支限制已於日前屆滿，有競爭嘅地方選區同功能界別候選人，亦陸續向選舉事務處提交開支申報表。其中同樣低票落選嘅工程界候選人陸宏廣同金融服務界候選人林德明，各用四萬一千八百蚊同八百四十蚊，除開佢哋嘅所得票數，平均一票成本要過百蚊，值唔值真係見仁見智。
屢敗屢戰嘅陸宏廣今屆只攞到三百九十二票，比當選嘅經民聯盧偉國（WK）少成二千五票。雖然係咁，佢嘅選舉工程仍然做得一絲不苟，包括請咗三個代理人幫佢打點競選活動，用咗萬幾蚊印製選舉宣傳品，包括喺工程師學會網站賣廣告，又用咗二千幾蚊買墨水同交電話費等。
林德明喺選舉中只係用咗八百四十蚊，印咗六百張選舉廣告周圍派，金額只及陸宏廣嘅百分之二，但由於佢最後只攞到五票，每票成本仍高過對方。林德明最後更因得票過低，畀選舉事務處沒收埋五萬蚊選舉按金，如果計埋落去，每票成本就仲高。