政情：朱曦撐香港誠品做得住
台灣「過江龍」誠品書店喺銅鑼灣開嘅香港首間分店，唔經唔覺已經開咗兩個月，由當初盛況空前不夜天，到依家好似熱潮已過。不過台北經濟文化辦事處處長朱曦前日出席一項「雙十」活動時，就力撐香港誠品做得好，認為依家係過渡期，相信港人需要慢慢消化同建立閱讀文化，唔擔心做唔住。
朱曦自言係一位書蟲，加上作為台灣喺香港嘅官方代表，自然有去香港誠品睇過，覺得文化氛圍唔錯，強調誠品唔淨只係賣書，仲係文化交流嘅好平台，書本只係交流文化嘅工具。對於港人對誠品嘅熱情冷卻，佢認為誠品喺香港係一個新品牌，要時間去建立。
朱曦來港已一段時間，問佢最鍾情邊種香港美食？佢好快就答話係深井燒鵝同埋廣東粥，真識食。同場仲有首次以官方身份來港嘅行政院陸委會副主任委員張顯耀，佢話仲未去過香港誠品，有機會會參觀吓。佢仲透露，最愛食港式菠蘿油同老火湯，仲因此肥咗個碼，要勤做運動修身。