政情：李家超利益申報證「清白」
新一屆立法會議員嘅利益申報資料日前已全部上網，部分議員持有大批物業、公司股份同董事職位，隨時出現利益衝突，剛啱由警隊過檔保安局做副局長嘅李家超（阿John），身家就非常「清白」。據尋日上網嘅申報資料，阿John不但冇任何政黨背景，物業方面亦只得何文田一個連車位嘅自住單位，係同太太聯名，其他聯絡方面就只有兩個警察會所會籍，肯定唔會畀立會議員質疑。
消息指阿John呢個何文田單位鄰近伊利沙伯醫院，稱得上係豪宅，已經住咗十幾年。至於佢一家四口，太太係家庭主婦，兩位公子都喺港大畢業，其中大仔仲喺法國攞到碩士學位，依家喺大機構做商業顧問，細仔則做銀行工，阿John就算唔入熱廚房都唔使憂。
據聞阿John喺決定離開警隊投身政治前，都諮詢過兩個囝囝意見，佢哋梗係擔心爸爸會畀班立會議員留難啦，不過阿John就自言有晒心理準備，會盡量解答到大家滿意為止，所以兩位公子最後都好支持佢。