政情：象哥衰手多 慘變獨眼龍
前日係新一屆立法會宣誓就任嘅大日子，七十名議員都執到正一正迎接呢個大日子，民建聯進出口界議員、人稱「象哥」嘅黃定光亦唔係例外，着晒西裝打晒呔出席，之後仲同黨友及全體議員影大合照留念。點知同日下午象哥返立法會開內會同財會時，突然用紗布包住隻右眼，變咗「獨眼龍」，原來一切都係手多多之過。
象哥同我哋講，前日朝早佢用手捽過隻眼，之後又腫又痛，睇醫生後證實隻眼發炎，要急急滴眼藥水。問佢太太、工聯會會長林淑儀有無話佢，象哥好坦白話「愛之深，責之深」，梗有畀人鬧喇！
話時話，依家開始踏入大閘蟹當造嘅季節，大閘蟹始終較寒涼，眾所周知象哥極好大閘蟹，不時同港府官員及傳媒食蟹聯誼。奉勸象哥聽醫生同太太建議，食少幾籮大閘蟹求盡快康復。