政情：議員再爆爭位戰
新一屆立法會前日正式開鑼，七十名議員呢頭先爭完各個委員會嘅正副主席，嗰頭又要為大學校董席位拗數。根據現行法例，立法會要分別互選出五位同三位議員，成為香港大學同中文大學校董。據聞部分上屆選出的議員校董，因為各種原因宣布唔再競逐連任，但亦有唔少無做過校董嘅新舊議員，想一嘗出任兩大校董嘅滋味，隨時又會爭崩頭。
上屆五名港大議員校董分別為民主黨涂謹申、工黨李卓人、民建聯葉國謙、經民聯石禮謙同新民黨葉劉淑儀，中大方面則為民建聯陳克勤、自由黨張宇人同人民力量黃毓民，八人之中有三人已表明唔會連任。
陳克勤要退EQ接力
陳克勤上屆當選後因為一句「try my breast」而畀中大學生寸爆，質疑中大唔需要一個連簡單英文都講唔正嘅校董。今屆克勤決定將校董一職交畀新丁黨友葛珮帆（EQ）接棒，原因係認為做一屆已足夠，與擔心會畀班中大生玩多次無關喎。EQ承認有心想做中大校董，因為自己係沙田區議員，又做過多年中大工程學院信息工程學系諮詢委員會，希望透過校董身份改善校政。
葉太就表示，近年忙於議會工作同搞新民黨，成日都開唔到校董會，再霸住個位都覺得唔好意思，加上港大不時都會請佢擔任高桌晚宴嘅演講嘉賓，唔使靠校董名銜都可以同學生接觸，因此決定唔會角逐連任。有意接替佢嘅係獨立建制派謝偉俊，原因係佢曾經喺港大讀過一年制法學專業證書課程，希望透過做校董回饋學校，為大學注入「正派」聲音。
另一表明唔會連任校董嘅係黃毓民，但係就同當年部分中大師生質疑佢「掟蕉」教壞細路無關，而只係純粹想畀其他新人做吓喎。
石禮謙張宇人想連任
李卓人亦正在認真考慮係咪連任校董，佢大呻呢個職位根本名不副實，無法有效向大學反映意見，都唔知做嚟做乜。佢憶述上次去港大開會，原本想同其他校董講吓點樣改善合約制教師同職員嘅福利待遇，點知全場無人理佢，尷尬一輪先有其他校董話「你嘅意見我哋收到啦」，令佢心都淡晒。據知公民黨黨魁梁家傑有意參選港大校董，如阿人真係唔選，就可能會由佢頂上。
有人辭官歸故里，有人漏夜趕科場，石禮謙同張宇人異口同聲話做多四年絕對無問題。其中剛當選財委會主席嘅張宇人，直言有人或會質疑佢身兼多職會力有不逮，但係佢就話自己做中大校董非常稱職，加上中大校董會多數喺中環開會，由立法會行過去都算方便，相信唔會影響議會工作。