中環出更：陳繁昌為CY難得「出城」
尋日係每月一度行政會議鳳凰午宴嘅日子，照例喺中環某間酒店舉行，特首梁振英（CY）、多名高官、行會成員、剛宣誓就任嘅新一屆立法會議員、以及大批政商界名人都有赴會。其中好耐無去過有關午宴嘅科技大學校長陳繁昌，尋日亦罕有出席。佢直言科大位處偏遠，如無要事甚少到中區走動，因此已有一段時間無出席行會午宴，不過為咗跟新任特首CY同新一屆行會成員聚首，點忙點遠都要「出城」一次。
大半年前CY仲係行會召集人時，鳳凰午宴係由佢主持，今次就變身座上客，由新任行會召集人林煥光介紹招呼，並於午宴上就香港最新經濟狀況發表演說。林煥光透露，佢以往擔任政府官員時，都經常出席行會午宴，見慣CY點樣做嘢，依家調換角色，做起嚟完全唔覺得陌生。
仍兼平等機會委員會主席嘅林煥光又話，依家每個星期都要花廿多個小時應付行會召集人嘅職務，由於周一至周五要處理平機會工作，好多時都要犧牲星期六日做行會事務。