中環出更：專資會考察油田「新」體驗

一行三十八名專資會團員，跟隨現已宣誓為立法會議員嘅團長兼專資會會長謝偉銓（Tony）浩浩蕩蕩出發，極地探險家李樂詩任副團長，同行仲有創會會長容永祺（Samuel）、前會長胡曉明、副會長黃偉雄及理事楊素珊（Susan）等。

楊素珊難忘去廁所

新疆景點多，遊完天山天池後，團友不忘考察埋能源設施，包括達坂城大型風車風力發電站，更深入中國最大沙漠塔克拉瑪干沙漠，行程緊湊。來到新疆，也有香港人足迹，佢就係前律政司司長梁愛詩的哥哥梁狄剛，依家喺當地擔任石油地質專家，勘探石油頂呱呱。油田範圍有唔少一級機密，但梁生人面夠，有佢帶路，通行無阻。

石油地質專家梁狄剛（中）帶隊深入考察塔中油田，謝偉銓（右）及李樂詩（左）齊話大開眼界。（被訪者提供）

團友喺克然木爸吾東的豪宅嘗美酒佳餚，楊素珊（白衣者）讚新疆水果種類多得驚人。（被訪者提供）

講番沙漠之旅，Tony夜深時段獨自浪漫，坐喺沙漠上仰望星空，可惜時近中秋，星星的光芒被月亮掩蓋，未見滿天繁星。沙漠荒涼無邊際，去廁所都係頭痛事。Susan話，每到上廁所時間，司機就將車停在沙丘，吩咐團友以「男左女右」方式，自找沙丘遮掩「解決」，天然味十足。

Samuel的好友克然木爸吾東住喺庫爾勒市，佢嘅家居裝修金碧輝煌充滿中東色彩，華麗如王宮，團友不禁嘩然。Susan話，單係飯廳張長枱，坐滿三十幾人都唔覺逼。主人家好熱情，擺滿一枱美食及水果，新鮮無花果、哈密瓜、提子等任食唔嬲，仲請嚟甜美新疆美女載歌載舞，上賓式招待，開心過去世外桃源。

卓妮