史上超長黃金周結束，又係埋單計數嘅時候，今年旅遊界係咪又執金執到手軟呢？
手軟就冇嘞，腳軟就有！內地客訪港人數雖然持續上升，但係消費模式轉變，消費金額下跌，旅遊業隨即敲響警鐘。
旅發局主席田北俊係咁講嘅，八日黃金周訪港嘅內地客達九十六萬人次，比上年七十七萬多兩成四，之但係消費額升幅放緩；同過去數月情況一樣，內地客人數上升兩成，但消費總額只上升半成，情況令人關注。如果你係旅遊業界，聽到咁嘅消息，唔腳軟就假！
其實，超級黃金周旺丁不旺財，唔使睇數據，睇市面都知。以內地客朝聖熱點尖沙咀為例，遊客係就係照樣瘋狂掃貨，不過掃嘅唔再係名牌手袋，而係罐裝奶粉；係就係照樣逼爆舖頭，不過幫襯嘅唔再係錶行名店，而係雜貨舖藥房。一葉知秋，黃金周黃金不再，反映香港旅遊之都嘅金漆招牌已經急速褪色，盛極而衰。
點解內地豪客突然對香港失去興趣呢？當局解釋，同內地經濟放緩有關喎。嗱嗱嗱，咁就奇嘞，按照呢個邏輯，點解台灣仲吸引到咁多內地貴客去美容整形，繼而成為寶島一條亮麗驕人嘅旅遊產業風景線呀？點解中國豪客變身「錢吉思汗」，大舉湧入歐美瘋狂掃貨，千方百計將德國企業、法國酒莊、意大利名牌收入囊中呀？一句講晒，內地客再冇興趣嚟香港揮金如土，主要原因唔係無錢，而係香港無吸引力啫。
唔係咩，桃李不言，下自成蹊，如果香港有吸引力，唔使你叫，內地富豪都會聞風而至。但係內地人家陣想買國際名牌，喺歐美掃貨款式又新價錢又平，點解仲要嚟香港冒險先。冒乜嘢險？嗱，萬一酒店房間又話爆滿，客人家係咪又被迫入住危機四伏嘅無牌賓館呀？嗱，香港景點十年如一日，萬一又撞啱纜車故障，咁咪又要被迫半天吊呀？香港旅遊配套天殘地缺，加上港人好客傳統不再，郁吓就叫人「滾回中國」，內地豪客過門不入，一啲都唔出奇喎。
所以話，講嚟講去，旅遊業前景堪憂，最主要嘅原因就係港產官僚不思進取，一味食老本。如果內地客消費放緩，情況持續惡化落去，就等如被慢性放血，遲早被陰乾o架咋！
咁講啦，港產官僚，旅遊業係香港四碌經濟支柱之一，如果唔想內地客遊吓遊吓遊咗去其他競爭對手嗰度，你哋就唔可以雲遊太虛，快啲諗計吸客，改善配套設施，刺激旅客消費，唔好再遊魂嘞！