本報「政情」版嘅花絮，老朽至鍾意睇，好似「海難頭七，貪曾酒店慶牛一」便很有意思。話說貪曾卸任後銷聲匿迹，立法會選舉投票後無耐，佢又活躍番，「十‧一海難」嘅「頭七」，貪曾竟然不知避嫌，六點多時一家人在大酒店慶祝佢六十八歲生日。
香港人都算有人情味，據稱有位長者仲同佢講生日快樂，但隨即突然問佢「你有冇事」，貪曾故作輕鬆話「冇事、冇事」，與此同時，曾太同細仔發現記者行蹤即時「黑面」，後者仲用手機反拍記者，曾太更發爛渣話：「好心你哋唔好再跟喇！」老朽但知係大明星、姐仔才有大隊狗仔隊日跟夜跟，估唔到貪曾明明已「燈火下樓台」，依然「星味」十足，難得啊難得！
貪曾已成香港「廉潔奉公」嘅反面教材，佢Hea咗七年，在任期間，至叻留番盤「殘局」畀CY，搞到CY舉棋不定，唔知橫車還是躍馬！貪曾在任時，原來不但精於「太極推手」，更叻係玩殘局！難怪CY開局不順，更頭頭碰着黑！
貪曾牛一，回首前塵往事並不如煙，確實飲得杯落！之不過，一個從政者下台後在自己「地頭」落得逢人閃避，遇記者面黑，都算失敗中嘅失敗。
貪曾嘅故事教訓大家，一個從政嘅人，其民望聲譽，並不是靠吹靠胡亂誇耀！而係靠口碑！唐代詩人杜荀鶴有句云：「惟憑野老口，不立政聲碑」。勳銜封號，金盃銀盃，通通不如口碑！曾爵士一出現，老朽即使有白內障，睇到嘅都係佢煲呔上個「$」字！