鄉議局主席劉皇發喺今屆立法會選舉，斗零都無使過就自動當選，佢嘅前自由黨黨友、同樣自動當選嘅批發零售界議員方剛，就申報用咗九萬幾蚊，超過四分之一用於選舉聚會，首先參加「報名團」陪佢報名，即可獲贈西餅一件，投票當日再有一個「謝票團」，六十人食咗二萬五埋單。不過無論攞餅定食飯，原來都係要開名嘅，因為方剛連團員名單都向選舉事務處申報埋，透明度相當高。
據聞方剛申報得咁謹慎，原因係上屆佢曾經唔小心漏報咗少少選舉開支，結果搞到被廉署請飲咖啡，所以今次就巨細無遺咩都報晒。同樣小心嘅仲有報名參選衞生服務界、但結果被裁定提名無效嘅馮玉娟，拎埋信用卡月結單嚟做收據證明，披露咗卡主唔少飲茶食飯嘅消費紀錄，不過卡主又並非佢本人喎，驚唔驚洩露他人私隱o架？
自動當選勞工界議員嘅工聯會鄧家彪，選舉開支只及方剛十分一，九千幾蚊就搞掂，包括花二千幾蚊拍攝造型同化妝，係咪物有所值，大家自行判斷。