政情：夏佳理重返法律老本行
前港交所主席夏佳理（Ron）行政會議召集人任期七月一日屆滿後，最近都少咗露面，尋日佢以新任香港藝術節協會主席身份出席記者會，被問到近況，本業做律師嘅Ron話，依家大部分時間都放喺律師行，回歸老本行。咁啱得咁蹺，Ron嘅律師行合夥人、前立法會議員劉健儀（Miriam）亦喺今次立法會選舉落敗，律師行有呢兩位星級大狀助陣，想唔旺都好難嘞。
Ron向來好勤力做嘢，從來唔會考慮退休。佢仍然係西九文化局董事局成員之一，佢話西九進展得好順利，不過對新政府係一個挑戰。佢大讚政務司司長林鄭月娥對文化區嘅發展方向掌握得好清晰，事關對方做發展局局長嘅時候，對成個計劃已經好了解，所以一上任司長，好快就上手。Ron坦言，西九文化區嘅用地已經批咗，錢又批埋，立法會亦都通過咗，特首梁振英做行會召集人時已經好支持計劃，佢深信特首將來都會繼續支持喎。