政情：新一屆議員名字趣談
新一屆立法會議員明日宣誓，秘書處尋日公布佢哋嘅宣誓次序，連續做咗十四年議員、姓氏筆畫又最少嘅民主黨何俊仁排第一個，姓氏筆畫最多嘅立會新丁謝偉銓排最尾。
七十名議員當中，有三十七人都有申報英文名，其中有兩個Albert，包括何俊仁同陳偉業；兩個James，即係涂謹申同田北俊；兩個Kenneth，則有陳家洛同梁繼昌，同兩個Christopher，就係張華峰同鍾樹根。
有幾名新丁議員英文名無中文譯音，包括外號EQ嘅葛珮帆（Elizabeth Quat）、郭榮鏗（Dennis Kwok）、同梁繼昌（Kenneth Leung）等，其中莫乃光就仲特別，叫Charles Peter Mok，佢話呢個名係佢爸爸改落嘅，連出世紙都係咁寫。
此外，田氏兄弟田北俊同新民黨田北辰，除咗所屬政黨同政治立場有別，連姓名內個「北」字英文串法都唔同，前者係Pei，後者係Puk。田北辰話，原因係佢喺香港出世而大佬喺內地出世，又話自己「港產啲」。