政情：上任第百日 CY連趕幾場
尋日係新政府上任一百日，對於特首梁振英（CY）嚟講都無分別，都係一樣咁忙碌，仲要連趕幾場添。CY尋日先就政府擱置德育及國民教育科指引見記者，之後就要出席酒會，逗留咗約半小時。政府新聞處發稿，仲披露咗CY尋日會見過國家衞生部副部長黃潔夫添。
CY尋日行程都幾緊密，下晝就國民教育見記者，點知記者會未完，都未答記者問題就要走，由教育局局長吳克儉同國教科委員會主席胡紅玉做埋下半場。CY咁趕原來係因為要去一個酒會做嘉賓。CY趕到去儀式就即刻開始，佢同其他嘉賓打咗陣招呼，就同中聯辦副主任李剛交頭接耳，到祝酒時又再周圍同人碰杯，仲同范太握手寒暄咗幾句添。
行政會議成員羅范椒芬都有出席個酒會，佢就話政府喺過去嘅一百日都好努力，做咗好多實事。不過一百日對五年嘅任期嚟講只係好短日子，相信政府通過實踐同做實事，市民對政府嘅觀感會愈嚟愈好咁話喎。