中環出更:沈慧林預告明年拉天窗

男人事業有成,下一步就梗係要娶番個好老婆。卓妮尋日喺沙田馬場遇到「港產陀飛輪」萬希泉創辦人沈慧林(William)一家入場湊熱鬧,William大爆將於明年底與拍拖五年嘅女友Rachel拉埋天窗,確實係愛情事業兩得意,真係恭喜晒!

婚禮以中式為主

William話,本來佢同女友都想趁龍年好日完成人生大事,但大家都知,龍年旺嫁娶,訂酒席仲難過訂iPhone 5,加上萬希泉呢個「親生仔」創立咗唔夠兩年,William希望事業為重,惟有忍一忍,將婚期延至明年。至於擺酒地點,佢已經諗好喺尖沙咀洲際酒店舉行,由於爸爸比較傳統,所以婚禮儀式都會以中式為主,認真孝順。

尋日賽事有場香港廣東社團總會盃賽,主席王國強拉大隊出席,會長之一兼「新金王」金至尊主席黃英豪都喺度,原來佢係萬希泉嘅獨家代理,尋日佢同副主席廖漢輝不約而同戴上陀飛輪靚錶,夠晒搶眼。

第一手消息請下載on.cc東方互動iPhone/iPad/Android/Windows Phone Apps