小學選擇題，東鐵屬於邊類運輸工具？A：火車；B：貨車。嗱，以前學生如果揀B，一定畀老師打交叉，但家陣咯喎，揀B唔止冇人話你唔啱，仲隨時被老師讚觀察力強，觸覺敏銳添。
冇錯，港鐵已經變咗水客運貨、派貨、散貨嘅大本營，每日運送水貨數量龐大，種類繁多，簡直係另類物流業。就講啱啱過咗嘅「十一」黃金周吖，大家有冇發現，無論沙田站定旺角站，無論喺車廂定喺月台，隨處都可以見到塞滿各式貨品嘅行李篋、手拖車，大包小包都有，真係貨如輪轉o架！
咦，咪住先，上水站就話淪為水貨專用區啫，點解其他車站都係咁呢？問題就喺呢度嘞，水貨客被當局鐵腕掃蕩之後，百足之蟲，死而不僵，紛紛變陣轉去其他車站活動，以打游擊方式避開當局執法，結果咪搞到東鐵各站全線淪陷囉。所以咯喎，港鐵宣布下周二起實施行李重量限制，乘客行李不得超過三十二公斤，違者不准登車，新措施會喺上水、粉嶺、羅湖、落馬洲四站試行三個月。為咗配合措施，港鐵亦會增聘廿八名特檢隊人員同保安員，協助執法。
唉，上水站光復，東鐵線淪陷，即係話水貨亂象禁之不絕，對乘客嘅滋擾分分鐘仲嚴重咗添。功夫茶見到呢一幕，不禁想起唐詩《琵琶行》，改幾隻字就變成《水貨行》：「大篋嘈嘈如急雨，小篋切切撞親人；嘈嘈切切錯雜行，大包小包落月台。」一句講晒，當局快快整肅水貨亂象，唔好再嘈嘈切切喇！
講到整肅水貨亂象，東鐵以限制行李重量對付水客，夠唔夠力呢？你知啦，道高一尺，魔高一丈，你限制佢行李重量，佢可以將水貨分批速遞，你唔畀佢帶奶粉一類重型貨品，佢可以轉帶其他輕巧貨品，你都吹佢唔脹喎。情況就好似當局喺上水站清場，水客就向其他車站轉移，當局稍為鬆懈，水客亂象就會死灰復燃，擴散蔓延。
仲有呀，海關話，政府採取跨部門打擊行動之後，鐵路口岸嘅水貨活動有所收斂，但同時亦見到走私活動轉移至其他陸路口岸，單喺過去一個月，就至少搗破五宗利用汽車走私貴價智能手機同電子零件案件。呢類水貨活動雖然唔會影響乘客，警方都唔可以姑息縱容o架。
一句講晒，不怕水客打游擊，只怕執法不夠力。水貨亂象係長期問題，當局執法唔可以雷大雨小，更加唔可以虎頭蛇尾，一定要多管齊下，持之以恒。如果唔係，萬一搞到成條東鐵線都係水貨專用區，乘客生人勿近，中港矛盾想唔惡化都幾難！