立法會選舉結束咗將近一個月，候選人陸續向選舉事務處遞交選舉開支申報。尋日率先提交選舉開支申報嘅係一眾喺功能界別自動當選嘅議員，當中代表鄉議局嘅劉皇發就最「慳家」，成個選舉一毫子都唔使就贏咗個議席返嚟。
除咗發叔之外，代表工業總會嘅工業界梁君彥亦十分節儉，只係用咗四千一百六十元。不過，梁君彥實際上只係出咗三十元嘅曬相錢同一百三十元選舉代理人嘅交通費，事關有四千元嘅選舉代理人及助理人工係由佢嘅選舉代理人捐贈嘅，確實係出錢又出力。
相反喺區議會（第一）界別自動當選嘅民建聯葉國謙就最大花筒，洗咗六萬三千七百多元，當中淨係影宣傳相都用咗八千多元，真係貪靚。至於喺進出口界成功連任嘅黃定光，都用咗成四萬多元，但佢哋有個黨找數，所以使幾多都冇有怕啦！
其實冇政黨撐嘅議員一樣有「大水喉」射住，好似喺金融界當選嘅中銀高層吳亮星（星爺），成個選舉用咗一萬二千三百多元，全數都係由中銀（香港）捐贈。而代表中華總商會當選嘅廖長江，選舉就用咗一萬一千七百多元，當中兩場共花費二千多元嘅傳媒茶敍就係中總埋單。