政情:鍾國斌遲大到 焗睇「保安」

立法會議員每周除咗要開例行會議外,佢哋仲可以根據興趣加入唔同嘅事務委員會審議唔同社會議題。自由黨紡織及製衣業界議員鍾國斌(Felix)話,自己除咗有興趣加入環保同工商事務委員會外,仲因為開黨團會議遲大到而被「欽點」加入保安事務委員會。Felix講笑話,自己對保安事務一無所知,可能身形健碩似足「阿Sir」,所以先畀人誤會佢有豐富保安經驗喎。

Felix憶述,當日因為有其他工作而遲大到,當佢上氣唔接下氣咁趕到時,黨團會議都差唔多開完,一去到就有人話已經安排咗佢去保安事務委員會幫手,又話其他委員會已經畀人揀晒。Felix好無奈話,佢對保安事務一無所知,但都會虛心跟其他人學習嘅;佢又透露,雖然工作愈來愈多,但仍然堅持每日做「柴可夫」揸車送十五歲囡囡由西貢去香港仔返學,真係廿四孝爸爸。

第一手消息請下載on.cc東方互動iPhone/iPad/Android/Windows Phone Apps