政情：吳克儉新Look 爽上加爽
政府搞德育及國民教育搞到一頭煙，身為教育局局長嘅吳克儉早前都做到落晒形咁。不過，前日見到吳局長出席活動時上鏡，佢好似比之前精神爽利咗，原來係佢剪咗頭髮，頭頂本來好清爽嘅位置依然都係好清爽，但兩鬢嘅頭髮就剪短咗少少，睇落咪精神咗囉！不過，有人聽到吳局長剪頭髮就好好奇咁問：「吓？吳局長個髮型已經好清爽囉喎，仲剪？」
新聞秘書都換埋
吳局長除咗剪咗頭髮外，佢嘅新聞秘書亦都換咗。佢之前嘅新聞秘書李黎式暉（Mary Li）就調咗去政府新聞處政府總部新聞組出任總新聞主任（特別職務）。而之前喺社會福利署任首席新聞主任嘅張志明（Roger）就會接手Mary個局長新聞秘書嘅工作。有人聽到Mary調番政府新聞處，就即刻話：「總部需要佢！」睇嚟Mary嘅工作能力都備受肯定，未必如外界揣測話係吳局長對佢不滿嘅。
