政情：建制派封殺何秀蘭
新一屆立法會下周三正式開鑼，當日會選出大會主席、內務委員會及財務委員會正副主席等五個職位。其中內會正副主席之位，建制派及泛民主派早已協調取得共識，主席會由經濟動力梁君彥擔任，而副主席就會由工黨何秀蘭（Cyd）等三名泛民議員角逐。原本雙方講好互相協調人選各不干涉，但勢估唔到建制派因為各種理由唔想阿Cyd做副主席，否則連副主席個位都唔益泛民。
過去建制派一直囊括立法會大會、內會及多個重要嘅委員會主席職位，搞到泛民惟有走去做嗰啲冇乜殺傷力嘅委員會，而民主黨劉慧卿更加要喺建制派內訌下先可以成功偷雞做到財會主席。雖然建制派恃住人多話晒事係一個不爭嘅事實，但估唔到今屆立法會更加變本加厲。
有傳不欲工黨勢力坐大
話說尋日泛民飯盒會原先會由眾人投暗票決定內會副主席誰屬，點知劉慧卿就引述負責協調嘅民建聯葉國謙話，唔少建制派講明唔想阿Cyd做內會副主席，又揚言如果泛民堅持要派阿Cyd出戰，佢哋會不惜冒住畀人話無道義嘅風險，都要派人出選奪回副主席之位，究竟阿Cyd同葉國謙或建制派有乜恩怨呢？
有傳聞話，建制派或工聯會眼見工黨勢力日益壯大，而阿Cyd身為工黨一員，如果再做埋內會副主席的話，勢力同風頭將會進一步坐大；加上○三年區議會選舉時，阿Cyd喺中西區區議會觀龍選區打贏葉國謙，搞到雙方誓不兩立，估計有人趁今次正副主席選舉出手報仇都唔出奇。
據了解，泛民中人聽到對家咁講真係嬲到震，又話原則性問題無妥協餘地，又話泛民應該有自主權決定派邊個出戰，有乜理由可以畀建制派幫佢哋揀埋人選喎。如果泛民堅決唔退讓，分分鐘連副主席都冇埋，最後個位只會落入建制派之手，睇嚟泛民今次真係進退兩難喇。