中環出更：方文雄活化工廈 撐年輕人搞藝術
工廈活化計劃愈來愈受歡迎，唔少業主都入定貨，將舊工廈翻生。好似本身都有貨喺手嘅協成行董事總經理方文雄（David），都好認同呢項計劃可以將工廈更加物盡其用，佢旗下香港仔黃竹坑道嘅工廈活化項目，審批情況都差唔多搞掂，佢話會同藝術發展局合作，有部分就會同社福機構合作。
David向來好支持街頭文化，好似塗鴉藝術咁，佢出錢、出力又出地方，讓有興趣嘅年輕人發展所長，但嚟緊黃竹坑嘅項目，佢就考慮同其他嘅藝術家合作，可能會讓輕度弱智嘅藝術家喺工廈搞創作，佢仲大讚呢批年輕藝術家每一個都創意十足，喺藝術創作呢方面絕對唔輸蝕畀其他人。