中環出更：周一茹素救地球
社會企業Green Monday日前喺九龍灣零碳天地舉行慈善活動，致力推動每逢周一食素嘅運動。零碳天地係由環境局局長黃錦星設計嘅環保建築物，目前尚未正式開放，太子珠寶鐘錶執行董事朱繼陶（Joseph）伉儷、明天更好基金理事委員林曉盈、仁愛堂總理張瑋傑伉儷等已經急不及待到場先睹為快。
Green Monday聯合創辦人楊駿業（David）同魏華星（Francis）都係「無綠不歡」，David更加食素長達十一年。佢話初初食素係基於宗教理由，後來真正愛上蔬菜嘅清甜，更加與「三高」講拜拜，每年驗身都好放心。Francis就話，社企提倡每逢周一食素，其實係想大家由生活細節入手，逐步養成少肉多菜嘅習慣，幫助改善全球暖化問題。
至於Joseph就一直好支持素食，一來為咗減肥，二來太太朱鄧麗萍擔任佢嘅私人護士兼營養師，監督佢每日勤食菜果。唔少男士都係無肉不歡，但Joseph係例外，佢話素食都可以好美味，好似月前就喺公司動員發起素食行動。
黃兆龍唔揸車搭巴士
品牌Quiksilver總經理黃兆龍（Edward）都係今次慈善活動嘅合作夥伴，佢近期都開始咗周一食素，而且盡量唔揸車，改搭巴士。
Green Monday係以嶄新形式營運嘅社企，近似市場營銷公司嘅角色，並提供平台予環保愛好者交流，合作夥伴包括連鎖餐廳、醫院及大型企業等，嚟緊仲會同學校膳食供應商合作，將無肉星期一帶進校園。
卓妮