今個中秋唔止零舍清涼，仲特別悲涼。大批公公婆婆為咗一盒四蚊飯爭崩頭，不惜披星戴月通宵排隊，對呢班生活無依為勢所迫嘅長者嚟講，今年月光應該特別森寒。
唉，究竟貧困長者幾時至可以有啖安樂茶飯呢？嗱，前朝政府出咗名棄老、虐老，梗係遙遙無期啦，家陣曾蔭權落台滾蛋，情況終於露出曙光。當局計劃推出特惠生果金，向四十萬名合資格老人家每月發放二千二百蚊，連日子都敲定嘞，十月廿六日上立法會財委會申請撥款，如果十月底能夠順利通過，仲會加碼將生效日期追溯至十月一日添。
即係咁，貪曾亂港七年，做足七年忤逆仔，搞到好多長者臨老唔過得世，家陣新政府總算願意撥亂反正，對貧困老人施以援手，新措施係咪應該愈快落實愈好呢？仲使講，一定係啦，好多老人家等呢一日已經等到頸都長嘞！但好可惜，長者心急，政客唔急，反對派議員唔止冇為老人家肉緊，反而仲話要叫停特惠金，聲言要當局先行撤銷資產審查喎。
嗱嗱嗱，特惠金撤銷資產審查門檻，全港長者人人有份，理論上梗係好啦，問題係現實做唔做得到先？全港九十萬名長者不論貧富每月發放二千幾蚊，先唔講庫房長遠承唔承受得嚟，腰纏萬貫嘅富貴一族照樣攤大手板月月出厚糧，對納稅人係咪公平呢？唔好唔記得，上年港府派六千蚊益埋有錢人，已經觸發唔少爭議，如果爭拗重演，特惠金拖到何年何月至有望實施呀？貧困長者又要因而捱多幾耐苦日子呀？
喂，反對派政客就話啱啱當選，仲有四年時間同政府慢慢玩，但係好多公公婆婆不敵歲月垂垂老矣，唔係好多時間可以浪費o架咋！家陣香港極度政治化，社會吵吵鬧鬧永無寧日，特惠金一旦橫生枝節，驟起爭議，到拗得掂數，恐怕好多風燭殘年嘅老人家已經等唔到囉。咁搞法，搞事政客係幫咗老人家吖，定係害咗老人家呀？
至於有人揚言如果政府唔撤銷國民教育，就會以拉布阻延特惠金等民生政策，就更加無厘頭。國教還國教，特惠金還特惠金，以犧牲長者福祉嚟要挾港府，何止無品，簡直無良！
咁講啦，貧苦長者已經捱咗好耐苦日子，實在唔希望到下年中秋仲要過住舉頭望明月，低頭思飯盒嘅艱苦歲月。難得港產官僚開始懂得敬老，推出特惠金幫助老人家，議會政客咪做個順水人情囉，何必阻住地球轉呢？咪話功夫茶唔提醒，如果你哋學貪曾做政壇忤逆仔，一定會變成公公婆婆鵝頸橋底打小人嘅頭號目標o架！