噸位十足嘅候任立法會金融服務界議員張華峰，喺剛過去嘅選舉期間一度將體重減咗幾十磅，但言猶在耳卻又增磅在望。
講緊可能令佢增磅嘅「元兇」就係當造嘅大閘蟹，事關佢平均每次會食五隻大閘蟹，睇怕佢要有心理準備為減磅再諗計喇。
民建聯進出口界議員黃定光，每年都會同傳媒朋友食大閘蟹聚一聚，唔講唔知原來張華峰都係同道中人，過去都有同財經版記者以呢個方式聚會，適逢今年成功殺入立法會，佢話計劃搵埋政治版嘅老友記一齊食大閘蟹喎。倘若以一次食五隻大閘蟹計算，分開兩次夾埋已經食咗十隻，仲未計其他政壇老友嘅大閘蟹宴，呢條數認真襟計！
講開張華峰，不得不提佢「真正福建人」嘅身份，話說佢早前出席活動時，遇到同為閩籍嘅科技大學副校長黃玉山，黃趁機祝賀佢當選立法會議員，雙方之後又互笠高帽大讚對方，其中張華峰更疑似賣口乖，聲稱會選擇喺科大讀EMBA（在職工商管理碩士）課程，果然係同鄉三分親。