政情：黑英為學生哥「全薪」奉獻
前天文台台長林超英（黑英）平時生活為環保乜都慳，但佢對於未來棟樑就一啲都唔慳，事關佢將依家喺中文大學教書份人工，全部捐晒出嚟做獎學金，閒時又請學生食午餐，上堂又會派糖畀學生打氣，但佢話唔使擔心份長俸唔夠使喎。
黑英又話，依家政治氣候改變咗，公務員冇名冇利，政府需要穩定，員工嘅士氣亦要穩定，做管理層最重要係以身作則。
尋日我哋遇到黑英同太太由灣仔坐渡輪過尖沙咀，結婚四十年依然好溫馨，佢話啱啱先放咗個幾月長假去挪威嘅城巿Spitsbergen，林太仲親手喺longyearbyen（朗伊爾）掘咗塊樹葉化石返港，又去咗睇冰川、冰山同海冰，黑英話今年嘅海冰得好少，地球會變得更熱，所以佢呼籲大家減少消費，買少啲嘢，佢自己都身體力行唔買嘢，將購物重任交晒畀太太打點喎。