政情：衍陽法師贈詩提點高永文
出家人唔代表只顧靜修，不理凡塵俗事，有啲仲係緊貼時事o架。好似近日開書畫展嘅衍陽法師，尋日請到食物及衞生局局長高永文主禮，所以特別回贈一幅字畫畀高永文做紀念，字畫上有竹葉，竹葉旁嘅四句詩，更加係幫局長度身訂造，提醒高永文要放下身段，先可以聽到民間疾苦聲音。咁有詩意同深度，唔知高永文會唔會特別刻骨銘心呢？
衍陽法師請咗唔少嘉賓到場，原來每一位嘉賓都獲贈與別不同嘅字畫，而高永文就獲贈一幅畫有竹葉同竹枝嘅字畫，畫上四句詩文係：「柔枝常逐夢，潤葉總含情，俯首低眉聽，民間疾苦聲。」衍陽法師解釋前兩句話，覺得高永文遇上咩事都可以溫文有禮對待，好似竹枝咁柔和，就算對手點樣打擊，都想動之以情，則好似竹葉咁總有被滋潤嘅時候。後兩句提醒高永文要聆聽民間聲音，先要放低高官身段。
高永文話，自己唔係佛教中人，未能夠即時領悟詩中意思，但自己對佛教向來尊重，所以一定會花時間參透吓喎。