中環出更：胡炎松夫婦初戀訂終生
同初戀對象步入教堂相當難得，原來潮州商會青委副主任胡炎松（Anven）夫婦都係對方嘅初戀情人。平時Anven出席公開活動好多時都係一支公，老婆收得好密實，佢就解釋話係太太性格比較靜，好少應酬，所以身邊好多老友都未見過佢太太嘅真面目。不過，Anven日前就傳咗兩張同太太嘅合照畀卓妮，仲自爆當年同太太係書友，而且大家都係初戀添，點知一拍即合，確係佳偶天成。
話說Anven當年讀緊中五，認識咗當時係同學嘅太太，但嗰個年代嘅年輕人純過蒸餾水，又點敢開口追女仔吖！不過，眼見就快畢業，Anven怕再冇機會向對方示愛，於是鼓起勇氣拖對方隻手，結果成功贏得美人歸。Anven對愛妻讚不絕口，結婚廿幾年來都好信任佢，有時佢要往返內地公幹，太太從來都唔過問，亦從未出現「奪命追魂call」，令佢可以專注工作，所以話成功男士背後總會有個女人支持係冇錯嘅。