中環出更：造紙大王一家 馬場贏又贏
尋日沙田賽馬對廣大馬迷而言確係中秋節長假嘅最佳節目，有「造紙大王」稱號嘅理文造紙主席李運強就聯同三位公子入場，結果長子李文俊嘅愛駒「包裝選擇」贏得盃賽，而次子李文恩匹「包裝博士」亦於尾場奪冠，兩匹馬共贏取二百多萬元嘅獎金，可謂雙喜臨門。李家贏馬仲帶挈保良局副主席鄭錦鐘贏得四千元彩金，齊齊過一個袋袋平安嘅開心追月日。
心情勁靚嘅李運強喺賽事完結後仲宣布有餘興節目，就係一家人登上名下可容納百人嘅簇新意大利豪華遊艇，於維港之內觀賞煙花匯演，順道慶祝家人贏馬咁話。尋日有獎金落袋嘅名人馬主仲有新進立法會工程界議員盧偉國，雖然佢匹「京城三寶」跑第四，但都算攞番四萬多元獎金當做安慰獎。
本身以個人及團體名義各擁一匹良駒嘅盧偉國話，佢名下馬匹皆以「京城」命名，係紀念十多年前創下千六米速度紀錄並保持至今嘅名駒「京城之寶」。雖然盧偉國酷愛賽馬運動，但佢話會以議員公務為先，如果遇上周三開大會，必要時就放棄入場觀賞賽事喎。
莫華倫見月餅惹思念
至於甚少喺馬場出現嘅著名歌唱家莫華倫，就專程由北京趕返香港入場獻唱。佢話以往旅居歐美，每當黃葉乍現，月滿皎潔之時，月餅呢種應節美食就令佢倍加思念，特別係歐洲好難買到月餅。
講開月餅，飲食達人「幟哥」黃永幟就話，佢食嘅月餅係自家製造，改用紫薯或南瓜蓉餡料嚟焗製，食落不但香口，而且又健康。
卓妮