大家有冇同感，家陣去茶餐廳食飯愈來愈肉赤？事關呢一類平民飯堂變得好唔親民，兩個人撐枱腳求求其其食一餐，兩餸一湯隨時埋單過百元，收入微薄嘅草根階層未必食得起o架，唔通香港冇仗打都要食樹皮咩！
百物騰貴嘅情況之下，水深火熱可以話係香港嘅一道人文風景線。近日有連鎖快餐店推出四蚊飯優惠，馬上砰一聲造成轟動效應，排隊人潮水蛇春咁長，甚至有人天未光就擔櫈仔掗頭位。排隊人潮之中又以老人家居多，不少風燭殘年嘅公公婆婆為咗一盒四蚊飯爭崩頭，睇見都覺得可憐。喂，香港嘅長者多達九十萬，三分一徘徊於貧困邊緣，一見到快餐店推出抵到爛嘅四蚊飯，梗係好似餓狼傳說咁空群而出啦，冇理由坐以待斃啫。
既然四蚊飯造成轟動效應，係咪反映香港嘅貧富懸殊愈來愈嚴重呢？答案當然係啦，呢家嘢大家都耳熟能詳嘞，畢竟香港有另一道人文風景線，就係倚靠拾荒維生嘅銀髮一族通街都係，見到佢哋老態龍鍾仲要勞勞碌碌為口奔馳，眼淺少少都會悲從中來o架。
「東方報業民意調查」顯示，對於有人通宵輪購新手機，又有人排隊苦候四蚊飯，四成六受訪者認為反映貧富懸殊愈來愈嚴重；兩成二覺得財富分配不均；一成八形容香港社會發展畸形。
好嘞，功夫茶問問大家，愈窮愈見鬼、愈富愈巴閉嘅罪魁禍首係邊個呀？唉，講來講去咪就係前朝曾蔭權政府太廢柴囉，安老扶貧政策失敗透頂，搞到小市民臨老過唔到世，窮等人家又無法爬上脫貧階梯。
如果話梁朝新政府有心撥亂反正，喺今時今日咁嘅政治環境之下，講得出都未必做得到，因為反對派為反對而反對，火燒後欄嘅高官救火都救唔切啦，點樣為民生做實事呢？好似新政府十月向立法會財務委員會申請撥款，發放每月二千二百元長者生活津貼咁吖，新任反對派議員突然話要叫停喎，原因係設立入息審查不得人心。仲有喎，激進派政客最鍾意玩拉布，民生議題好容易就會遭受池魚之殃，一個唔覺意淪為政治鬥爭嘅犧牲品。
對於新政府撥亂反正迫在眉睫，推出利民措施亦被政黨追擊，四成受訪者不滿政黨為鬧而鬧，拖累施政；兩成六認為未能順利施政，市民最受害；兩成憂慮新政府施政阻力重重，寸步難行。
計功夫茶話齋，好心反對派政客聽一聽民意啦，唔好過於沉溺無謂嘅惡鬥，以免阻手阻腳延誤蒼生。你知啦，共產黨都唔鬥地主啦，港產政客鬥來鬥去有乜意義呢？萬一鬥到萬民唾棄，輸家係自己咋，蠢蛋！