政情：踢波靠把口 長毛唔認老唔得
立法會議員長期開會，基本上除咗把口有做運動（發言），大部分時間都係坐喺度，所以唔少連任多屆嘅議員都有同一特徵，就係得票不停下跌，體重不斷上升。社民連梁國雄今屆再次連任，雖然佢無跌票，但體重難逃上升命運。尋日佢同一班即將參加「無家者世界盃」嘅露宿者進行友誼賽，踢咗廿分鐘就氣喘如牛，而且講波多過踢波，睇嚟五十六歲嘅長毛，真係唔認老都唔得。
以前長毛喺綠茵場上跑嚟跑去面不改容，但依家跑唔夠十分鐘就變踱步，當年「風之子」嘅感覺已經一去不返。不過長毛都識為自己定位，既然唔夠氣，惟有靠把口，全程都扮演隊長角色，不時指揮隊友走上走落，呢啲咪叫輸人唔輸陣囉。
同場仲有另一位被稱為社福界長毛嘅張超雄，但似乎佢比長毛仲不濟，踢唔夠五分鐘就被換走，佢話自己右腳有舊患，估唔到一上場就拗親要退下火線。但既然叫得社福界長毛，當然唔係浪得虛名，佢一落場就捉住喺場邊嘅勞工及福利局局長張建宗，猛講最低工資，睇嚟議會先係張超雄嘅主場喇。