政情：貪曾去飲鬼祟過人
新世界發展主席鄭家純二仔鄭志明前晚結婚，喺君悅酒店筵開三十五席，當晚冠蓋雲集、衣香鬢影，「貪曾」曾蔭權爵士亦係座上客，同現任特首梁振英、前任特首兼全國政協副主席董建華一齊獲主人家安排坐喺主家席，不過貪曾行為特別鬼祟，既拒絕其他賓客合照，散席時亦唔行正門，認真唔大方。去飲去得咁鬼祟，不如匿返屋企算喇。
可以出席前晚晚宴嘅，喺社會都有一定知名度同地位，反觀貪曾醜聞纏身，早前更有傳被有關方面下令禁止回港，近日先至蒲番頭，理論上如果有些少羞恥之心，待人接物都應該會有改變。可惜江山易改，本性難移，貪曾前晚繼續鬼祟，到達晚宴場地時扮大方行正門，但散席時竟然要動用近十名警方保護要人組同酒店職員，靜靜雞咁行秘道離開。
其他嘉賓嘅行為，當然無煲呔曾咁怪異啦，好似董建華同埋特首梁振英，兩個全晚笑容滿面，入場時雖然冇接受訪問，但至少都會向傳媒揮揮手、甚至企定定畀大家拍照，離開時亦同樣大大方方行正門。政治人物嘅表現從來都係見微知著，貪曾卸任後仍然左避右避，唯一解釋可能就係「身有屎」。
反問「有乜好影」 失禮賓客
有與會者透露，三位前、現任特首雖然同獲安排坐喺主家席，董建華同梁振英都客客氣氣，對所有要求合照者，全部來者不拒，反而貪曾就唔知點解，竟然回絕人哋合照嘅要求，仲反問對方「有乜好影」，據講搞到嗰位嘉賓好尷尬，當然無諗過影張相都碰到一鼻子灰。
貪曾前晚走秘道離開宴會後，佢屋企尋日全日落晒窗簾，兩公婆直至黃昏至蒲頭，去咗堅道嘅教堂望六點鐘嘅彌撒，結束後兩人與一名意大利籍神父寒暄，記者舉機拍攝，貪曾叫記者「唔好騷擾神父」，曾太鮑笑薇好唔高興，責問記者：「你哋做乜嘢？」記者問佢會唔會同家人聚餐慶祝中秋，佢都無答。兩公婆之後乘座駕AM388去咗灣仔會展中心嘅金紫荊粵菜廳食飯，中途為咗避車，仲幾乎發生意外。
提問被廉署查 兩公婆黑面
晚飯十點鐘食完，兩公婆被問及係唔係被廉署查緊，兩人面黑冇答，更離譜嘅係，有關方面安排佢嘅座駕駛經地盤離去，擺脫記者採訪。
東方報業集團記者尋日喺佢淺水灣嘅屋企附近守候，可能有人報咗警喇，現場警方保護明顯加強，雖然曾經有警員要求查記者身份證，但亦冇阻撓採訪，而且仲笑笑口添。前線警員咁友善，相信同貪曾神憎鬼厭有莫大關係啫！話時話，警方為「保護」貪曾，出動咗唔少G4，淨係警車都最少動用咗兩部，真係浪費警力。