中環出更：孫至誠帶隊去吞拿魚專賣店

淨睇個店名就估到同台灣有關，事關台灣將吞拿魚叫做鮪魚，難怪負責拓展台灣外貿市場嘅台北貿易中心主任孫至誠，新官上任未夠半個月，就約埋遠東貿易中心主任陳光丕去嘗鮮。

順億老闆林錫偉（Derek）及太太Lina現身招呼，佢哋係香港人，因為睇好魚場直送嘅天然新鮮概念，所以與順億合作，將專賣店引入香港。Derek話，順億擁有自家遠洋船隊，親赴大西洋、印度洋及北冰洋捕撈，然後即時將魚肉保存喺零下六十度嘅超低溫環境，確保肉質新鮮衞生。四年前順億喺台灣首創專賣店，至今喺中港台已有逾廿間分店。

吞拿魚下巴一試難忘

港人視Toro係刺身極品，其實Toro只係吞拿魚嘅前腹，成條魚仲有好多正嘢，包括極考功夫嘅烤吞拿魚下巴，仲有啖啖膠質嘅吞拿魚尾骨，包保一試難忘。