中環出更：李麗娟「媽打效應」輕鬆籌300萬善款
前民政事務局常秘「媽打」李麗娟退休後變身「籌款天后」，上周五再次「發功」，為鄰舍輔導會舉行「愛‧分享」慈善晚宴，幫助自閉症人士，城中名人一呼百應，爭相慷慨解囊。「媽打效應」再次使得，一晚輕易籌得近三百萬元善款。
媽打與長江製衣創辦人陳瑞球、紀惠集團主席廖湯慧靄、太子珠寶鐘錶主席鄧鉅明等，齊齊擔任晚宴籌委會榮譽顧問，出錢又出力。唔少名人又捐錶又捐酒，由前行政會議成員梁智鴻及名媛林李婉冰擔任「拍賣官」，三扒兩撥籌得七十多萬元。前東華三院主席李三元都以兩萬元投得一支限量版三十年威士忌，佢話自己唔飲酒，志在做善事。籌款成績咁好，媽打興奮到又唱又跳，細妹李桂蘭都唱埋一份，引來滿堂掌聲。
鄭海泉細女幫大女接生
晚宴上有位稀客，就係滙豐亞太區前主席鄭海泉。見佢好風騷，原來啱啱榮升公公，大女Simone凌晨四點幾誕下六磅重B女，仲係任職瑪麗醫院婦產科醫生嘅細女Hidy通宵幫手接生，鄭大班首次做公公，緊張到瞓唔着。榮升婆婆嘅鄭海泉太太，感動到想喊，送贈玉墜賀孫女。鄭海泉就期望孫女乖乖讀書已足夠，長大後唔一定要做銀行大班喎。
同場仲有食物及衞生局局長高永文話小時候好乖，中秋從不煲蠟，但會用蠟燭滴落汽水蓋自製玩具，比吓邊個彈得遠，諗起都懷念。至於月餅，身為「潮州冷」嘅佢，當然首選潮州月餅。
卓妮